Icele leMDC elikhokhelwa nguMnu Morgan Tsvangirai liqhubekele phambili ngohlelo lwalo lokukhalala ukuphatheka emihlanganweni yedale leCabinet kanye leleCouncil of Ministers ngoLwesibili.
Imihlangano yeCabinet yenziwa ngoLwesibili maviki wonke, njalo ngoLwesibili bekuyiviki yesithathu ibandla leli lingaphatheki emihlanganweni le.
UMongameli Robert Mugabe yena uqhube umhlangano weCabinet njengenhlalayenza labaphathintambo beZanu PF kanye labeMDC ekhokhelwa nguMnu Arthur Mutambara, kungelani lokukhalala kwabeMDC kaTsvangirai.
UTsvangirai wazise mhlaka 14 ngenyanga edluleyo ukuthi ibandla lakhe kalisoze libe lisaphatheka kunhlelo zeCabinet kuze kulungisiswe okuhluphayo kuhulumende womanyano.
Umgcinisihlalo weSadc njalo enguMongameli weDRC uMnu Joseph Kabila
uhlangane loMugabe, uMutambara kanye loTsvangirai ngoMvulo ekhulumisana labo
ngokuhluphayo.
Ekhuluma ngemva kokuhlangana loKabila, uTsvangirai uthe ukhangelele ukuthi iSadc Troika ilungisise udaba lweZimbabwe esithi kungehlula, iSadc ngokwayo kuzamele yenze umhlangano ozangenwa ngabakhokheli bamazwe wonke eSadc.
Kodwa uMugabe uthe ukholwa ukuthi konke okuhluphayo kulakho ukulungisiswa nguye, uTsvangirai kanye loMnu Mutambara kungela kungenela kwabakwamanye amazwe. UMnu Mutambara yena ukhuthaze uKabila ukuthi angenele ngamandla kudaba lweZimbabwe.
Uthe uhulumende womanyano
engabhidlika, akulamuntu ozananza uMugabe. Ngalokhu, uthi kukuye ukuthi alungisise
okuhluphayo kuhulumende ukuze kwenqatshelwe lokhu.
ISadc Troika izaqhuba umhlangano wokuzama ukulungisisa okuhluphayo kwelweZimbabwe ngoLwesine eMozambique, njalo uMugabe, uTsvangirai kanye loMutambara bazaphatheka emhlanganweni lo.
Umphathintambo obona ngokwenzakala emawofisini kaTsvangirai, uMnu Gorden Moyo uthi ukungaphatheki kwabo emihlanganweni yeCabinet akutsho ukuthi emsebenzini abayi.
Ingcwethi ecubungula ezombusazwe uMnu Brilliant Mhlanga utshele uNtungamili Nkomo weStudio 7 ukuthi usola kakhulu ukukhalala imihlangano yeCabinet okwenziwa yiMDC kaTsvangirai.
