Inhlanganiso ekhankasela ukulondolozwa kwelungelo loluntu, iAmnesty International sixwayise ukuthi eleZimbabwe lilakho ukubuyela kudlakela olube khona nyakenye nxa konke okuhluphayo kuhulumende womanyano kungalungisiswanga ngokuphangisa.
Inhlanganiso le ithi njalo ukwephulwa kwelungelo loluntu elizweni kuqhubekela phambili kungalani lokuthi sokulohulumende wobumbano ogoqela inhlangothi zombili zeMDC kanye lebandla leZanu PF, elikhokhelwa nguMongameli Mugabe.
I Amnesty International ikhuthaze iqula leSadc Troika eliqalise inhlolisiso yalo ngokuhluphayo eZimbabwe ngoLwesine, ukuthi lidingisise ngokwephulwa kwelungelo likazulu khona ethi kuya kuqhela.
Inkuthazo le iza kulesiphathamandla seUnited Nations esivinjwe nguhulumende ukungena elizweni ngoLwesithathu ukuyahlolisisa ngendaba zokulondolozwa lokwephulwa kwelungelo loluntu nguhulumende womanyano.
UMnu Manfred Nowak uvinjwe ukungena eZimbabwe sefike egcekeni lendezamtshina eleHarare International Airport. Iziphathamandla ze immigration zilele zimlindile egcekeni leli zambuyisela eSouth Africa ngendizamtshineni yakuqala ekuseni ngoLwesine.
UMnu Nowak ukhonone kakhulu ngendlela aphathwe ngayo ekhuluma lalumsakazo, wathi uzamangalela uhulumende weZimbabwe kugatsha lweUnited Nations olubona ngezamalungelo kazulu ngokumalisa ukungena elizweni.
Igqwetha elilwela ilungelo loluntu uMnu Matshobana Ncube utshele uNtungamili Nkomo weStudio 7 ukuthi ngempela uvumelana leAmnesty International ekuthini udlakela lulakho ukuqhamuka futhi ngoba uhulumende eqhubeka engahloniphi amalungelo kazulu.
