Inhlanganiso ye Zimbabwe Election Support Network i ZESN ibika ukuthi kulezisebenzi zayo ezimbili ezibotshwe ngamapholisa eDete izolo ntambama ziqhuba umhlangano wokulimukisa uzulu ngendaba zokhetho.
Umnumzana Thulani Ndlovu loNdodana Ndlovu babotshwe izolo ntambama ngamapholisa eDete kodwa uNdodana wakhululwa namhla ekuseni.UThulani usiwe emapholiseni e Hwange njalo iZESN isithumele amagqwetha eHwange ukuyalungisa loludaba. Ababili laba betheswa icala lokuqhuba umhlangano bengacelanga imvumo yamapholisa.
Ukubotshwa kwababili laba kulandela ukubotshwa njalo kweziphathamandla zenhlanganiso yeNANGO eVictoria Falls ngeSonto. Kuyonale iviki njalo kuphose kwathunjwa esinye isiphathamandla sebandla leMDC elikhokhelwa nguMnumzana Morgan Tsvangirai eHarare, uNkosikazi Edith Mushayire, ophunyuke ngemva kokuhlaba umkhosi.
Esinye isiphathamandla se MDC le uMnumzana Pascal Gwezere laye uthunjwe ngamadoda abehlome ngemibhobho emzini wakhe eMufakose ngolweSibili ntambama kodwa wabuyiselwa emzini wakhe izolo ekuseni. AbeMDC babika ukuthi elizweni sokuqhamuke udlakela lokuhlukuluzwa kwabasekeli balo ngemva kokuphuma kwalo nganxanye kuhulumende womanyano.
UNkosazana Anna Moyo ligqwetha elilwela ilungelo loluntu. UNkosazana Moyo utshele uBrenda Moyo weStudio7 ukuthi izehlakalo lezi ziveza sobala ukuthi ilizwe liqhubeka lisephula amalungelo kazulu.
