Inhloko kahulumende njalo engumkhokheli welinye lamacele eMDC, uMnu Morgan Tsvangirai uqhube umhlangano labameli bamanye amazwe eZimbabwe ebachasisela ngohlupho ibandla lakhe elibhekane lalo kuhulumende womanyano, ngoLwesithathu.
UTsvangirai uchasisele abameli bamazwe la ngokuphuma nganxanye kwebandla lakhe kuhulumende womanyano, kanye lakho konke okuhluphayo okugoqela ukwala kukaMongameli Robert Mugabe ukufungisa osibalukhulu bezabelo, abeMDC.
Ekhuluma emhlanganweni lo uTsvangirai uthe ukhangelele ukuthi iSadc ingenele kulungisiswe konke okuhluphayo lokhu. Ngolwesine khona iqula leSadc Troika likhangelelwe ukufika elizweni ukuyacubungula indlela uhulumende lo asebenza ngayo.
Ibandla likaTsvangirai lazise kumaviki amabili edluleyo ukuthi kalisoze libe lisaphatheka kunhlelo zedale leCabinet leCouncil of Ministers kuze kulungisiswe konke okuhluphayo kuhulumende womanyano.
Kodwa umphathintambo obona
ngokwethulwa kwemibiko uMnu Webster Shamu njalo elilunga leZanu PF wethule Imbiko yokuthi uMugabe ulakho ukukhetha
abaphathintambo abazathatha izikhundla zabaphathintambo bebandla likaTsvangirai
bona abangasaphatheki kuCabinet.
I MDC kaTsvangirai
yona isola imbiko le, isithi uMugabe engenza njalo
uyabe ephambanise kakhulu. Umphathintambo obona ngokwenzakala
emawofisini kaTsvangirai uMnu Gorden Moyo uthi uTsvangirai wazise abameli bamanye amazwe eZimbabwe laba ngokunengi okuhluphayo.
Kunjalo nje kubikwa
kulabantu abagqekeze endlini kaMoyo eHarare ngoLwesithathu emadabukakusa
babulala amafasitela bezama ukumngenela endlini. Kodwa abantu laba
babikwa basuke babaleka ngemva kokuba uMoyo ethusele ukuthi uzadubula lowo
ozalokotha angene endlini yakhe.
UMnu Thabang Nare, yena osebenzela
ewofisini kaMnu Moyo utshele uNtungamili Nkomo weStudio 7 ukuthi amaphiolisa asadingisisa ngesehlakalo lesi, esithi akukacaci sobala ukuthi singaba siphathelane lezombusazwe kumbe ngamasela ekade ezama ukuntshontsha.
