Isinqumo sebandla le ZANU PF esokuthi ozathatha isikhundla sika muyi uMnu. Joseph Msika, owayengumsekeli ka mongameli welizwe, kumele abe ngoselesikhathi eside ekubandla le ZAPU njalo ephethe isikhundla esiphezulu, semukelwe ngendlela ezitshiyeneyo ngabantu elizweni jikelele.
Inengi elikhulume le Studio 7 lithi ngabe ababengamalunga eZAPU bayazilungisela loludaba, bengacatshangelwa njengabantwana abancinyane, kukanti abanye bathi abeZAPU bavele bayeyiswa ngokuthi behlale bethatha izikhundla zabasekeli.
Lokhu kwenzakala ngoba sokuqhutshwe amabizo ambalwa alabo abafuna ukuthatha lesisikhundla, kulokuthi kuvunyelwane oyedwa. Asebephumele egcekeni ukuthi bayasikhwabitha ngababeyiziphathamandla ze ZAPU, abagoqela uMnu. Cain Ginyilitshe Mathema, uMnu. Naison Khutshwekhaya Ndlovu, kanye lo Brigadier-General Ambrose Mutinhiri. USithandekile Mhlanga we Studio 7 uxoxe lo Mnu. Walter Nsununguli Mbongolwane, ingcwethi ecubungula ezombusazwe, ukuzwe sizwe imbono yakhe ngaloludaba.
