Njengokutsho kwalo ngaphambilini - icele leMDC elikhokhelwa yinhloko kahulumende uMnu Morgan Tsvangirai - kaliphathekanga emhlanganweni wedale labaphathintambo eleCabinet obukhona ngoLwesibili, ongenwe ngabaphathintambo beZanu PF labecele leMDC elikhokhelwa nguMnu Arthur Mutambara.
Abaphathintambo bebandla likaTsvangirai baqhube owabo umhlangano emawofisini ebandla labo eHarvest House bakhulumisana ngokutshiyeneyo okuhluphayo kuhulumende womanyano. Umhlangano lo ubukhokhelwa ngumsekeli kaTsvangirai, uNkosazana Thokozani Khupe.
UTsvangirai yena uqhube umhlangano lomgcinisihlalo weSadc Troika njalo enguMongameli weMozambique, uMnu Armando Guebuza eChimoyi kulelo lizwe emazisa ngokuphuma kwebandla lakhe kudale leCabinet lakuCouncil of Ministers.
Unobhala jikelele weSadc uMnu Tomaz Salomao laye uphatheke emhlanganweni lo. Esuka eMozambique uTsvangirai uzakuya kwele DRC ukuyacela umgcinisihlalo weSadc jikelele, uMnu Joseph Kabila ukuthi iSadc ikhulumisane loMongameli Mugabe kulungiswe okulokhu kuhlupha kuhulumende womanyano.
Umphathintambo obona ngenhlelo zamanzi njalo eyisiphathamandla seMDC ekhokhelwa nguMnu Tsvangirai, uMnu Sam Sipepa Nkomo, uthi ibandla lakhe aliwunanzi umhlangano weCabinet obe khona phakathi kwamalunga eZanu PF laweMDC kaMutambara.
Kodwa osaphethe isikhundla sikanobhala obona ngenhlelo zebandla kuZanu pf, uMnu Richard Ndlovu usole kakhulu ukungaphatheki kwabaphathintambo beMDC kaTsvangirai kuCabinet esithi ibandla leli nxa lifuna ukuphuma kuhulumende womanyano, kalihle liziphumele nje.
Ingcwethi ecubungula ezombusazwe uMnu Samukele Hadebe utshele uNtungamili Nkomo weStudio 7 ukuthi ukukhalala ukuphatheka kunhlelo zeCabinet kweMDC kaTsvangirai kuyisibonelo sokuthi uhulumende womanyano lo ulakho ukubhidlika yiloba nini.
