Umsekeli wenhloko kahulumende engumkhokheli njalo welinye lamacele eMDC, uMnumzana Arthur Mutambara utshele intathelizindaba eHarare ngoMvulo ukuthi akufanelanga uMongameli Robert Mugabe aqhubekele phambili ngenhlelo zikahulumende eziphathelane lezombuso nxa amabandla wonke alobe isivumelwano sikahulumende womanyano engekho kulezinhlelo.
UMutambara uthe iziphathamandla zebandla lakhe ezingamalunga eCabinet, zizaqhubeka ziphatheka kulezonhlelo ukwenzela ukuthi zimise izinqumo ezingalunganga ezingathathwa ngamalunga e ZANU PF.
USithandekile Mhlanga we Studio 7 uxoxe lo Mnumzana Moses Mzila Ndlovu, isiphathamandla secele le MDC elikhokhelwa nguMnu. Mutambara, ongumeli weBulilima edaleni lephalamende, ukuze achasise ukuthi isinqumo lesi basithethe ngazizatho bani.
