Ilizwe le Sweden eliyilo eliphethe ubukhokheli
benhlanganiso ye European Union selisole kakhulu ukuhlukuluzwa kwamalunga
ebandla le MDC, okukhanya kulokhe kuqhubeka elizweni, ngemva kokubunjwa kuka
hulumende womanyano lisithi lokhu ngokwezombusazwe.
Embikweni owethulwe ekupheleni kwayonale iviki eleSweden lisola kakhulu ukubotshwa kutsha kukamgcinisikhwama webandla leMDC elikhokhelwa nguMnumzana Morgan Tsvangirai uMnumzana Roy Bennet, ngeviki edluleyo, kodwa wakhululwa, lokuhlukumezwa nje kwamanye amalunga ebandla leli.
ISweden ithi ukungahlonitshwa kwelungelo loluntu lomthetho elizweni kuveza sobala ukuthi amabandla akuhulumende womanyano awazinikelanga ukuhlonipha lokulandela iziqondiso zesivumelwano se Global political Agreement, yakhuthaza ilizwe ukuthi lihloniphe umthetho.
Kunjalo nje inhlanganiso ezizimeleyo elizweni zithi zifuna uhulumende aveze abalwela ilungelo loluntu abayisitshiyagolombili ababotshwa nyakenye besetheswa icala lokufuna ukugenqula uhulumende kamongameli Robert Mugabe. Kuze kube namhla abantu laba abaziwa ukuthi bangaphi.
Abanye bakhona nguMnumzana Gwenzi kahiya wako Zvimba, Ephraim Mabeka lo Lovemore Machokoto abavela eGokwe, uGraham Matehwa wesigabeni se makoni south, labanye. amapholisa athi awalalwazi lokuthi abantu laba bangaphi, sokulokwesabela ukuthi engxenye babulawa.
UMnumzana Peter Muchengeti lilunga lenhlanganiso ezizimeleyo eye NANGO eyisiphathamandla njalo se Bulawayo Agenda. UMuchengeti utshele uBrenda moyo weStudio 7 ukuthi ukwephulwa kwamalungelo abantu lokungahlonitshwa komthetho elizweni kwenza kube nzima ukuthi eleZimbabwe lithole uncedo eliludinga kwamanye amazwe.
