Umphathintambo wezemfundo uMnumzana David Coltart namhlanje uhlangane lezisebenzi zohlangothi olubona ngezemihloliso olwe Zimbabwe School Examinations Council-ZIMSEC ngenjongo yokuzwisisa izikhalazo zezisebenzi lezi eziqale ukukhalala umsebenzi ngeviki edluleyo, zifuna ukwengezelelwa iholo.
Ezinye zezikhalazo lezi yilo iholo eliphansi, ukungethembeki kweziphathamandla ezisezikhundleni eziphezulu ezibikwa zitshaphaza imali enikwa lolugatsha nguhulumende. Kodwa u Coltart uthe emhlanganweni wanamhla izisebenzi lezi zehlulekile ukuveza ubufakazi bokutshaphazwa kwemali yiziphathamandla.
UColtart uthe ukhangelele ukwenza omunye umhlangano lezisebenzi lezi kusasa wokulungisisa udaba lweholo. Isisebenzi esihola imali ephansi sifuna ukwengezelelwa iholo lifike kumakhulu amane amadollar eMelika-U-S$ 400 ngenyanga. UColtart uthembise izisebenzi lezi ukuthi uhulumende uzakwenza konke okusemandleni akhe ukuthi alungisise konke okuzihluphayo.
UMnumzana Felix Magalela Mafa lilunga le khomidi yedale lephalamende ebona ngezemfundo. UMafa utshele uBrenda Moyo weStudio 7 ukuthi izisebenzi zeZIMSEC kumele zibekezele zinike uhulumende isikhathi sokulungisisa okuzihluphayo.
