Izisebenzi ze Zimbabwe School Examinations Council- iZIMSEC, zibikwa ziqale ukukhalala umsebenzi izolo zifuna ukwengezelelwa iholo. Izisebenzi lezi zithi zifuna isisebenzi esihola amadollar edlula alikhulu kancane-US$115 sengezelelwe lifike kumakhulu amane- US $400.
Isiphathamandla seZIMSEC uMnumzana Ezekiel Pasipamire utshele iphephandaba le Herald ukuthi kuliqiniso ukuthi izisebenzi zeZIMSEC ziphakathi kokukhalala imisebenzi esithi zimelele ukuzwa okuzavela kugatsha lwezemfundo.
Ukukhalala umsebenzi kwezisebenzi lezi ngalesisikhathi izifundi ze grade 7, O le A- level zimele zibhale imihloliso kubonwa ngabanye njengemizamo yokubamba uhulumende ngamandla ukuthi aphangisise ukulungisisa izikhalazo zezisenzi ze ZIMSEC.
Umphathintambo wezemfundo uMnumzana David Coltart uthi laye wemukele umbiko lo namhla, wathi kuqakathekile ukuthi ugatsha lwakhe luhlale phansi lezisebenzi zeZIMSEC kukhulunyiswane ngodaba lolu.
UMnumzana Joshua Mhambi umbalisi weZimbabwe osehlala eSouth Africa, utshele u Brenda Moyo weStudio7 ukuthi ukukhalala umsebenzi okwenziwa ngabe ZIMSEC ngalesisikhathi kuzakwenza ukuthi uhulumende aphangise ukulungisisa izikhalazo zabo, laloba kuzaphazamisa imihloliso.
