Akukabi lensuku zatshwala kuqhamuke ukucunuka kwabantu besigaba seMandebeleni phezu kwamazwi ethulwe yisiphathamandla secele leMDC elikhokhelwa nguMnu Morgan Tsvangirai, uNkosikazi Sekai Holland yena ochaze obeyinkosi yamaNdebele eminyakeni edlula ikhulu edluleyo, uMzilikazi njengesela lenkomo.
Lungakahlali phansi uthuli phezu kwamazwi kaNkosazana Holland, uMnu Samuel-Sipepa Nkomo, oyisiphathamandla njalo secele likaTsvangirai, sengezelele ukufuthelana okukhona ngokuhlikihlela isawudo emanxebeni abantu beMandebeleni.
USipepa-Nkomo ubikwa etshele umhlangano webandla lakhe eTsholotsho ngempelaviki ukuthi ibandla leZapu lafa langcwatshwa loMnu Joshua Nkomo. Ngalokhu uthe abafuna ukuvuselela lelibandla kumele baqale baye emalibeni eHeroes Acre bayevusa uNkomo nxa befuna ibandla leli livuke.
USipepa-Nkomo usole labo asebevuselele iZapu, ikakhulu uMnu Dumiso Dabengwa esithi ngabantu abangaziyo into abayenzayo. UMnu Joshua Nkomo, obhubhe ngo1999, nguye obekhokhela ibandla leZapu lingakamanyani leZanu ngo1987.
Indodana kamuyi, uMnu
Sibangilizwe Nkomo utshele uChris Gande weStudio 7 ukuthi kuyamangalisa ukuthi uSipepa-Nkomo engethula amazwi anje yena ekhulele emulini yakoNkomo njalo belobuhlobo.
