Inhlanganiso yabalimi abamhlophe, iCommercial Farmers Union (CFU) ithi udlakela solubhahe ngamandla emapulazini abamhlophe kulezinsuku abasekeli beZanu PF beqhubeka bethumba amapulazi besusa abalimi amamhlophe emapulazini abo.
Umkhokheli walinhlanganiso uMnu Deon Theron utshele umhlangano ophathelane lezokulima kwele South Africa ngoLwesithathu ukuthi udlakela lolu lumemetheka mihla lamalanga, esithi njalo uhulumende kumele athathe amanyathelo okulumisa.
Iqembu elibunjwe nguhulumende womanyano ukudingisisa ngokwenzakalayo emapulazini kunyanga ezedluleyo lukhangelelwe ukunikeza ugatsha leJoint Monitoring and Implementation Committe (JOMIC) ugwalo lwempumela yalo ngoLwesine.
UChief Executive officer weCFU, uMnu Henrik Olivier utshele iStudio
7 ukuthi udlakela solufike kuzinga elibi emapulazini, esithi lokhu kuphazamisa kakhulu imizamo yokuqeda indlala elizweni.
Kunjalo nje iwofisi yenhloko kahulumende uMnu Morgan Tsvangirai selandule imbiko ethulwe ngumphathintambo obona ngezemithetho uMnu Patrick Chinamasa yokuthi ugatsha lwe council of ministers luvumelene ngeviki edluleyo ukuthi iZimbabwe iphume kuhlangothi lwedale leSADC Tribunal.
Umphathintambo obona ngokwenzakala ewofisini kaMnu Tsvangirai, uMnu Gorden Moyo utshele uNtungamili Nkomo weStudio 7 ukuthi eleZimbabwe kalisoze liphume kuSADC Tribunal, esithi ingamanga imibiko ethulwe yi Herald.
