Inani lamaZimbabwe angena kwele South Africa liqhubeka lisanda lalobanje sekulomnyaka kulotshelwane isivumelwano sokubunjwa kukahulumende womanyano. Izihambi emgceleni weBeitbridge, zitshele iStudio 7 ukuthi kayikho into eziguqukile empilweni zabo kungelani lembiko ethi isimo somnotho siba nganeno.
Eminyakeni eyisitshiyagalombili edluleyo, iSouth Africa isiphenduke yama ngumuzi wesibili kwabanengi beZimbabwe. Ukusilela kokudla ezitolo kubambe ngamandla abanengi ukuthi bachaphe umngcele besiyathenga impahla zokusebenzisa loba ezokuthengisa. Njengobanje inani labangasebenziyo seleqe laya phezu kwesilinganiso sokungamatshumi ayisitshiyagalolunye ekhulwini, abadala labancane bafulathele ilizwe besiyazama amadlelo aluhlaza eGoli. Izisebenzi zikahulumende lazo zinyomuke ngobunengi sezibona iholo seligugudwe yikuphela amandla kwedola leZimbabwe elingasekhoyo.
Ukulotshwa kwesivumelwano sikahulumende womanyano emnyakeni odluleyo lokubunjwa kwalo uhulumende bekukhangelwe ngabanengi njengempendulo yazo zonke inhlupho zeZimbabwe.
