UMongameli Jacob Zuma weleSouth Africa njalo engumgcinisihlalo weSadc ufike eZimbabwe ngoLwesine lapho akhangelelwe ukuhlangana lenkokheli yamabandla abumba uhulumende womanyano ntambama eHarare namuhla bekhulumisana ngokuhluphayo kuhulumende.
UZuma ucelwe ngamacele womabili eMDC ukuthi azezama ukulungisisa okuhluphayo, ikakhulu udaba lukasibalukhulu webhanga elikhulu lelizwe uMnu Gideon Gono lodaba lwegqwetha elikhulu likahulumende uMnu Johannes Tomana.
Amacele eMDC athi afuna ababili laba basuswe ezikhundleni lezo ngoba uMugabe engazange akhulumisane labo lapho ebafaka kuzo. Kodwa ilunga leZanu PF politburo njalo engumphathintambo obona ngezomvikela welizwe uMnu Didymus Mutasa uthi ibandla lakhe kalisoze livume ukuthi uGono loTomana basuswe.
Uthi uMongameli Mugabe uzakubeka sobala kuMnu Zuma lokhu namuhla. UMutasa wengeze wathi uTomana lo Gono ngamalunga eZanu PF, ngalokhu uthi bekuvele kungadingeki ukuthi uMugabe akhulumisane loTsvangirai kanye loMutambara ekubakhetheni kwakhe.
Umsekeli wesikhulumeli secele leMDC elikhokhelwa nguMutambara uMnu Renson Gasela uthi amazwi kaMutasa awokuthi uGono loTomana ngamalunga eZanu PF, aqinisa isizatho seMDC esokuthi ababili laba basuswe ezikhundleni.
Isikhulumeli sikaMnu Tsvangirai uMnu James Maridadi uthe ibandla lakhe likhangelele ukuthi uZuma elungisise konke okuhluphayo okugoqela udaba lokufungiswa kukaMnu Roy Bennet kanye labosibalukhulu bezabelo.
