Okhokhela elinye lamacele eMDC njalo engomunye wabasekeli benhloko kahulumende uMnu Arthur Mutambara uthi kazisoli ngamazwi awethule emhlanganweni wabaphathintambo eNyanga ngeSonto awokuthi kwaba lokuqilibezela okuthize kukhetho olwenziwe nyakenye.
UMutambara wethule amazwi la ekhuluma ngodaba lukazibuse okhululekileyo emhlanganweni wamalunga edale lecabinet, okubangele ukuthi abaphathintambo beZanu PF baphume kiwo besithi uMutambara utshengisa ukungahloniphi ibandla labo.
Umphathintambo wezemithetho uMnu Patrick Chinamasa nguye okhokhele amalunga eZanu PF ekukhalaleni umhlangano lo, wona oqale ngoMgqibelo. Injongo yomhlangano lo bekuyikuhlaziya indlela uhulumende asebenza ngayo selokhu ebunjiweyo.
UChinamasa usole kakhulu amazwi kaMutambara watshele iphephandaba le The Herald ukuthi amalunga eZanu PF kasoze aphatheke njalo emhlanganweni lapho uMutambara azakhuluma khona ngoba kuyinto yakhe ukuhlala ethethisa kumbe ukusola ibandla leZanu PF.
UMutambara yena ekhuluma leStudio 7 uthe kazisoli ngitsho ngamazwi akhe, esithi yinto eyaziwa ngumuntu wonke ukuthi iZanu PF yaqilibezela kukhetho lwanyakenye. Amazwi ethulwe nguMutambara izolo abikwa selumathise ngamandla ukufuthelana phakathi kweMDC leZanu PF.
UMongameli Jacob Zuma wele South Africa njalo engumgcinisihlalo weSadc ukhangelelwe ukufika eHarare ngoLwesine ukuyakhulumisana loMongameli Robert Mugabe, inhloko kahulumende uMnu Morgan Tsvangirai lomunye wabasekeli bakhe uMnu Arthur Mutambara mayelana lokuhluphayo kuhulumende womanyano lo.
Elinye ilunga leZanu PF elingathandanga ukuqanjwa litshele umsakazo lo ukuthi ibandla leli liphathwe kakubi yincwadi yeMDC ethunyelwe igqwetha likahulumende uMnu Johannes Tomana eyokuthi lelibandla lifuna kuhluzwe udaba lwabasekeli balo ababulawayo kukhetho olwedluleyo.
Umphathintambo obona ngokwenzakala emawofisini enhloko kahulumende uMnu Gorden Moyo uthi laloba kulokufuthelana njalo kulabanye abafisa umanyano okhona udilike, uhulumende lo uya phambili njalo usebenza kuhle.
Ingcwethi ecubungula ezombusazwe, uMnu Brilliant Mhlanga
uthi kuyamangalisa ukuthi abe Zanu PF bazondiswe ngamazwi kaMutambara, esithi
yinto eyaziwayo ukuthi iZanu PF yaqilibezela kukhetho olwedluleyo.
