Inhlanganiso ye United Nations ibika ukuthi sokuqhamuke umkhuhlane wecholera esigabeni seChibuwe eChipinge. I UN ithi kulabantu abalitshumi lambili abahlaselwe ngumkhuhlane lo, abalitshumi belatshwe basila kuthi ababili lokhe beselatshwa e Chibuwe Clinic. I UN ithi umkhuhlane wecholera ulakho ukumemetheka ngesikhathi sokuna kwezulu.
Inhlanganiso le ithi njalo imbangela yomkhuhlane lo oqhamuke nyakenye lokhe zingalungisiswanga, okungenza umemetheke ngesiqubu esikhulu. Ithi uzulu emaphandleni lasemadolobheni lokhe ebhekane lohlupho lokusilela kwamanzi ahlanzekileyo.
Ngeviki edluleyo i UN yethule umbiko othi inhlanganiso zomhlaba eziphathisa ngencedo zikhanya zidonda ukuphathisa eleZimbabwe. Umkhuhlane wecholera ubulele abantu abedlula inkulungwane ezine -4288 yahlasela phose abazinkulungwane ezilikhulu- 98 591.
Sixhume udokotela Morgan Sebele othi umkhuhlane wecholera uyelapheka lokuvikeleka lula kodwa uzulu kumele azinikele ukuzivikela emkhuhlaneni lo.
