Inhloko kahulumende uMnu Morgan Tsvangirai uhlangane loMongameli Jacob Zuma wele South Africa ngoMvulo bekhulumisana ngendaba ezihluphayo kuhulumende womanyano eZimbabwe.
Ekhuluma lentathelizindaba ngemva komhlangano lo, wona oqhutshelwe kwele South Africa, uZuma uthe uzakhulumisana loMongameli Mugabe, uMnu Arthur Mutambara kanye lenkokheli yeSadc mayelana ngokuhluphayo eZimbabwe babonisane ukuthi kungalungisiswa njani.
Kunjalo nje, unobhala obona ngobudlelwane beMelika lamazwe omhlaba uNkosikazi Hillary Clinton uzakuya kwele South Africa
ekupheleni kwayonale iviki ukuyakhulumisana loZuma ngodaba lweZimbabwe kanye lezinye eziphathelane lezwekazi le Africa.
UNkosikazi Clinton uzakwethekelela amazwe ayisikhombisa eAfrica agoqela i Kenya, DRC, Nigeria, Liberia, Angola kanye le Cape Verde. UZuma uthi laloba zilesisindo izinto ezilokhu zihlupha kuhulumende weZimbabwe, ziyalungiseka.
