Inhlanganiso yeKimberly Process ithi isizamisa eleZimbabwe ukuthengisela amazwe omhlaba ilitshe eliligugu lama diamonds agejwa eChiadzwa esigabeni se Marange eManicaland, nxa uhulumende engehluleka ukulungisisa udaba lokwephulwa kwelungelo loluntu esigabeni lesi.
Abekimberly process bathi iZimbabwe izavinjwa ukuthengisa ama diamonds la enhlanganisweni ebona ngokuthengiswa kwawo emhlabeni jikelele eye Kimberly Process Certification Scheme. lokhu kulandela ukwethekelela okwenziwe ngabenhlanganiso le elizweni ukuzohlola udaba lokwephulwa kwelungelo loluntu esigabeni seMarange.
Inhlanganiso ye Amnesty International yethule umbiko othi kulabantu abedlula amakhulu amabili ababulawe ngamapholisa lamasotsha emigodini yeChiadzwa.
UBrenda Moyo weStudio 7 ukhulume lengcwethi kwezenotho uMnumzana Walter Nsununguli Mbongolwane othi uhulumende weZimbabwe kumele aphangise ukulandela izinqumo zabe Kimberly Process ukuze avunyelwe ukuthengisela amanye amazwe amadiamond avela eChiadzwa.
