Umhlangano wokudinga imibono kazulu ngodaba lokulotshwa kwesisekelo sombuso esitsha, oke waphanjaniswa ngabasekeli beZanu PF ngoMvulo uqhutshwe kuhle ngolweSibili njalo ekupheleni kwawo kubunjwe amakomidi alitshumi lasithupha azakuya kundawana ezitshiyeneyo zelizwe kumaviki esiyadinga imibono kazulu ngokumele kumunyethwe yisisekelo lesi.
Amalunga amakomidi la azakhethwa ensukwini ezimbalwa ezizayo. Unobhala wephalamende uMnu Austin Zvoma usole kakhulu ikomidi yedale lephalamende ekhokhela uhlelo lokulotshwa kwesisekelo sombuso esithi kayiqhubanga kuhle umsebenzi wayo, yikho kuqhamuke udlakela ngoMvulo.
UZvoma wethule amazwi la ekhuluma lentathelizindaba eHarare ngolweSithathu. Inhlanganiso ezizimeleyo ezifana leNCA, iZINASU leZCTU zithi zizaqhuba umhlangano wazo zidinga imibono yalabo abaphikisana lohlelo lukahulumende olokulotshwa kwesisekelo sombuso, ukuthi kuyini okumele kwenziwe ukuvimba loluhlelo.
I NCA ithi umhlangano lo uzaqhutshwa mhlaka 27 kuyonale inyanga. Umsekeli kanobhala jikelele we ZCTU uMnu Japhet Moyo uchasisa okunengi ngomhlangano lo, kungxoxo ayenze loNtungamili Nkomo weStudio 7.
Kunjalo nje, abantu abafika amakhulu amahlanu abaphatheke emhlanganweni wokulotshwa kwesisekelo sombuso esitsha ngolweSibili bathe gwaqa egcekeni leAfrica Unity Square ngoba bengasela mali yokugada amabhasi bebuyele emizini yabo endaweni ezitshiyeneyo zelizwe.
Abantu
lababathi ikomidi ye phalamende, eyiyo ekhokhela uhlelo lwesisekelo
lesi ibithembise ukuthi izabapha imali zokuphindela emakhaya. Kodwa
bathi iziphathamandla zekomidi le sezisala ukubanikeza leyo mali. UMnu
Innocent Mpofu ovela eLower Gwelo ngomunye wabantu laba. UMpofu uchasisela uNtungamili Nkomo weStudio 7 okubehleleyo.
