Umeli weChipinge South edaleni lephalamende njalo elilunga leMDC, uMnu Meki Makuyana utholakale elecala lokuthumba lokubangela udlakela ngumthethwandaba kamantshi eChipinge ngoLwesine wanikwa isigwebo sokupika okomnyaka owodwa lengxenye.
UMakuyana utholakale elecala kanye labasekeli beMDC abathathu abathi uMnu Hardwork Masaiti ongukhansila ka ward 26 eChipinge South, uSimon Chaya loWedzerai Gwenzi.
UMakuyana labathathu laba ngamalunga ecele leMDC elikhokhelwa nguMnu Morgan Tsvangirai. Kulandela ukugwetshwa kwabo, amagqwetha abamelayo akhweze isicelo emthethwandaba weHigh Court emini ephikisa isinqumo sikamantshi lesi.
Isigwebo sabo sehlisiwe ngenyanga eziyisithupha, okutsho ukuthi bazapika okomnyaka owodwa kuphela. Kulamaviki edluleyo kulamalunga ecele likaTsvangirai athize abotshiweyo esetheswa amacala ehlukeneyo njalo amanye atholakale elamacala.
Umeli weMutare West uMnu Shuah Mudiwa utholakale kumaviki edluleyo elecala lokuthumba wagwetshelwa ukupika okweminyaka eyisikhombisa. Umeli weChimanimani West u Lynette Kanyeri utholakale elecala lokuqilibezela kwezokhetho, kodwa kakaphiwa isigwebo.
Umeli weKwekwe uMnu Blessing Chebundo lomeli weMutasa Central uMnu Trevor Saruwaka betheswa icala lokubamba iganyavu.
Isiphathamandla seMDC uMnu Sam Sipepa Nkomo njalo engumphathintambo obona ngenhlelo zamanzi uthi kuyamangalisa ukuthi kungani kungamalunga ebandla lakhe kuphela atholakala elamacala, kungela ngitsho loyedwa oweZanu PF kumbe owecele leMDC elikhokhelwa nguMnu Arthur Mutambara.
