Izizalwane zeZimbabwe zimanyene lamanye amazwe omhlaba ziyakhala ngokulahlekelwa ngumhlabeleli olodumo uMichael Jackson obhubhele kweleMelika izolo. Odokotela abakethuli imbangela yokufa kwakhe kodwa uthwalelwe esibhedlela se Los Angeles izolo ngemva kokutholakala inhliziyo yakhe isime ukusebenza njalo engasaphefumuli.
UMichael ubhubhe eseleminyaka engamatshumi amahlanu njalo ubephakathi kokulungiselela imidlalo emikhulu eLondon ngenyanga ka July. UJackson uke wethekelela eleZimbabwe ngomyaka ka 1998 wahlangana loMongameli Robert Mugabe. Umuyi uphile impilo ebimumethe okunengi abanengi abehluleke ukukuqondisisa, okugoqela imizamo abanye abathi yayingeyokuzama ukuguqula umbala wejwabu lakhe lisuka kwelimnyama lisiba mhlophe. kodwa ukubhubha kwakhe sokubambanise abantu umhlaba wonke jikelele.Utshiye abantwana abathathu.
UBrenda Moyo weStudio 7 ukhulume lezizalwane ezimbili zeZimbabwe lazo eziphakathi kobuhlungu. Owakuqala ngunkosikazi Sheilla Mthupha wenkulumane. Sixhume njalo isakhamuzi seNtumbane koBulawayo uNkosazana Siphathisiwe ncube.
Ezinye Indaba ZeStudio7...
