Inhloko kahulumende uMnu Morgan Tsvangirai uqhubekele phambili ngohambo lwakhe kwele Bhilithani ngoLwesibili ngokukhulumisana lamalunga edale lephalamende alelo lizwe kanye labameli benhlanganiso ezizimeleyo.
UTsvangirai ugqiba uhambo lwakhe ngoLwesithathu ngokwethekelela kwele France. Ekhuluma emhlanganweni wezenjiwayo eLondon uTsvangirai usole imithetho yezenjiwayo eZimbabwe esithi ivimba amankampani avela kwamanye amazwe ukuthi azevula amabhizimusi eZimbabwe.
Umphathintambo obona ngezokwenjiwa elizweni uMnu Obert Mpofu, oyisiphathamandla seZanu PF ubemele abekhona kulumhlangano kodwa eleBritain limncitshile ivisa. Lokhu kubikwa kucunule kakhulu inkokheli yebandla leZanu PF.
UMpofu ukuluhlu lwabantu beZanu PF abafakelwe izijeziso yiBhilithani njalo abangavunyezwayo ukungena kulelo lizwe. Laloba eleBhilithani livimbe umMofu, linikeze amavisa iziphathamandla zeZanu PF ezimbili ezibalisa uMnu Walter Muzembi loMnu Simbarashe Mumbengegwi labo abakuluhlu lwezijeziso zeBritain.
Ababili laba bayingxenye yequla likaMnu Tsvangirai. Sixhume ingcwethi ecubungula ezombusazwe uMnu Mlamuli Nkomo othi laloba uTsvangirai elezifiso zokuthi kulungisiswe umumo elizweni, lokhu akusoze kube lula ngoba abeZanu PF bengakuboni ngaso linye.
