Inhloko kahulumende uMnu Morgan Tsvangirai oseMelika kuhambo lwakhe lokwethekelela emazweni aphetsheya ube lomhlangano ngoLwesine lonobhala obona ngobudlelwano beMelika lamanye amazwe, uNkosikazi Hillary Clinton bekhulumisana ngokuvuselelwa kobudlelwano obuhle phakathi kweZimbabwe leMelika.
NgoLwesihlanu uTsvangirai uzahlangana loMongameli Barack Obama bekhulumisana ngodaba loncedo oludingwa yiZimbabwe lobudlelwano phakathi kwamazwe womabili. UNkosikazi Clinton uncome kakhulu uTsvangirai esithi ungumuntu oselwele ilungelo loluntu okwesikhathi eside, okhanya njalo ezimisele ukuthi uhulumende womanyano aphumelele.
