Amabandla abumba uhulumende womanyano athi i MDC le ZANU PF ayavumelana ukuthi ubudlwangu dlawangu sobehlile elizweni. Namhla amanye amaphephandaba abesithi ubudlwangu dlwangu buyaqhubeka elizweni njalo buzakwanda ngesikhathi sokhetho oluzayo okuphume kungxoxo okuthiwa yenziwa nguNkosikazi Sekai Holland lomsakazo we BBC.
UNkosikazi Holland uthi ingxoxo le engabe wayenza kudala dala kusese lobudlwangu dlwangu elizweni, kodwa okwakhathesi ukuhlukuluzwa kwabasekeli be MDC ngabe ZANU PF buya buphela kancane kancane. Inhlanganiso ye Zimbabwe Peace Project ithi kuliqiniso ukuthi ubudlwangu dlwangu sobuphela elizweni, isithi kodwa ihlangana lezikhubekiso ezinengi kumizamo yokunceda labo abahlukuluzwayo esikhathini esedluleyo.
UBrenda moyo weStudio 7 ukhulume loNkosikazi Holland umphathintambo emahofisini enhloko kahulumende ebona ngezokuxolelana othi ubudlwangu dlwangu sobuphela umakulinganiswa lobekusenzakala ngesikhathi esifanayo ngomnyaka odluleyo.
Kunjalo nje uChief Whip webandla leZANU PF Joram Gumbo uvumelana loNkosikazi Holland ukuthi ubudlwangu dlwangu sobuphela.
