Inhloko kahulumende uMnu Morgan Tsvangirai, yena ofike eMelika ngoMvulo lequla lakhe baqale ukuqhuba imihlangano leziphathamandla zikahulumende kaMongameli Barack Obama ngoLwesibili.
UTsvangirai ufike eMelika evela kwele Netherlands kuhambo lwakhe lokucela uncedo lwemali emazweni aphetsheya kanye lokuzama ukuvuselela ubudlelwano lamazwe la.
EleMelika lona lithi liphathwe kubi ngokungabikhona kwenguquko esobala kwezombusazwe elizweni, njalo lithi kalizimiselanga ukwesula izijeziso elizethulele uhulumende kaMongameli Mugabe kanye lamankampani eZimbabwe athize eminyakeni embalwa edluleyo.
Imbiko le yethulwe ngumsekeli kanobhala obona ngendaba zezwekazi le Africa kuhulumende weMelika ngoMvulo uMnu Johnnie Carson. UTsvangirai uzahlangana loMongameli Obama ngoLwesihlanu.
Ele Netherlands lazise uTsvangirai lequla lakhe ukuthi lizimisele ukusebenzelana leZimbabwe kanye lokuyincedisa kuphela kungaba lenguquko esobala kwezombusazwe. Lo ngumbiko munye uTsvangirai akhanya ewuthola kuhambo lwakhe ngapha eMelika.
Ingcwethi ecubungula ezombusazwe uMnu Dumaphi Mema, ongumkhokheli wenhlanganiso ye Association of Zimbabweans Based Abroad uthi uTsvangirai ulakho ukuphenduka elengise izandla nanku amazwe asewethekelele esithi kakazinikeli ukupha iZimbabwe imali.
