Umqondisi wenhlanganiso yeZimbabwe Peace Project uNkosazana Jestina Mukoko labasekeli beMDC abalitshumi lasikhombisa babuyiselwe entolongweni ngoLwesibili ngemva kwesinqumo somthethwandaba kamantshi esokuthi babuyiselwe ezandleni zomthetho.
Isinqumo sikamantshi uCatherine Chimanda sicunule kakhulu amagqwetha emela laba bantu, inhlanganiso ezizimeleyo ezilwela ilungelo loluntu kanye lebandla leMDC.
UMukoko labasekeli beMDC laba, bona abetheswa icala lokuqhuba imisebenzi yobuhlamuki kanye lokufuna ukugenqula uhulumende kaMongameli Mugabe babotshwe nyakenye kodwa bakhululwa ngoMbimbitho ngemva kokuhlawuliswa imali yesibambiso, i bail.
Ababotshiweyo laba bahle basiwa ejele leChikurubi. Embikweni eliwethule namuhla emini icele leMDC elikhokhelwa nguMnu Morgan Tsvangirai lisole kakhulu isenzo lesi lisithi lokhu kufaka uhulumende womanyano engozini enkulu.
UMugabe yena uhlangane lenhloko kahulumende uMnu Morgan Tsvangirai kanye lomsekeli wakhe uMnu Arthur Mutambara namuhla bekhulumisana ngodaba lwabo Mukoko lolu kanye lokunye okulokhu kulenga kusivumelwano sika hulumende womanyano.
Umphathintambo obona ngokwenzakala emawofisini kaTsvangirai uMnu Gorden Moyo uthi emhlanganweni lo abathathu laba bavumelane ukuthi babize umphathintambo wezemithetho uMnu Patrick Chinamasa ukuthi azechasisa ngodaba lokubotshwa kwabomukoko.
Amagqwetha abantu laba, abagoqela uMnu Kisimusi Dlamini, Shadreck Manyere loMnu Ghandi Mudzingwa, ahle agijimela emthethwandaba weHigh Court akhweza isicelo ephikisa isinqumo sokubotshwa kwabo.
I High Court izahluza loludaba ngoLwesine. Elinye lamagqwetha amela uMukoko labanye bakhe uMnu Harrison Nkomo usole kakhulu isehlakalo lesi.
Ingcwethi ehlaziya ezombusazwe uMnu Brilliant Mhlanga uthi okwenzakalayo kuveza ukuthi ngempela ibandla leZanu PF yilo elilokhu liphethe intambo zombuso laloba sokulohulumende womanyano.
