Iziphathamandla zecele le MDC elikhokhelwa nguMnu. Morgan Tsvangirai kanye lentathelizindaba ethatha imifanekiso abasanda kukhululwa ejele ye chikurubi eharare, baphinde babotshwa njalo lamuhla ntambama.
Ababotshiweyo laba ngabaMnumzana Ghandi Mudzingwa, Shadreck Manyere kanye lo Khisimusi Dlamini. UDlamini lo Gandhi bebeselatshwa esibhedlela ngemva kokulimala besejele lapho abathi babehlukuluzwa khona.
Isikhulume secele le MDC elikhokhelwa nguMnu. Morgan Tsvangirai, uMnu, Nelson Chamisa, utshele istudio 7 ukuthi lokhu yikwephulwa kwesivumelwano se Global Political Agreement.
Kusenjalo, umhlangano obuphakathi kukamongameli Robert Mugabe labasekeli bakhe, kanye lenhloko kahulumende uMorgan Tsvangirai labakhe abasekeli obukhona izolo ubikwa ubelokudonselana kwaze kwabizwa iziphathamandla ezaziphatheke kunkulumo zokulungisa ingxabangxoza eselizweni ezazithunganyelwa ngowayengumongameli we South Africa, uMnu. Thabo Mbeki.
Abe MDC babikwa bebuzisise umongameli Mugabe ukuthi kungani ehlezi esephula isivumelwano se GPA.
Istudio 7 ixoxe lo Mnu. Rejoice Ngwenya, ingcwethi ecubungula ezombusazwe ukuzwe esiphe imbono yakhe ngodaba lokwephulwa kwe GPA lokhu.
