Usibalukhulu webhanga elikhulu lelizwe ele RBZ, uMnu. Gideon Gono, ubikwa esithi amalunga edale lephalamende abebandla le MDC kumele babuyisele imota abaziphiweyo njengokutsho kukamphathintambo obona ngezemali, uMnu Tendai Biti. UGono ubikwa esithi imota lezi bekumele zibe sezibuyiselwe lamuhla ntambama, kodwa usadinga ukuthi isikhathi sengezelelwe zibuyiselwe ngolwesihlanu kuyonale iviki.
I MDC ithi imota lezi zithengwe ngentengo ephezulu lona ilizwe lingelamali ngakho alifuni ukuthi zemukelwe ngoba kungangcolisa igama lebandla. Umnu. Siyabonga Malandu Ncube, omela i Insiza edale lephalamende, ekucele le MDC elikhokhelwa nguMnu. Arthur Mutambara, ngomunye wabemukele imota.
UMalandu, okukomidi ebona ngelungelo labameli balelidale, utshele uChris Gande we Studio 7 ukuthi bekufanele ukuthi bezemukele lezimota ngoba zizabanceda ekufezeni umsebenzi wabo, njalo bazithole kuhulumende hatshi kubandla le Zanu PF.
