Ukuthunjwa kwamapulazi abalimi abamhlophe kubikwa kuqhubekele phambili endaweni ezinengi zelizwe, okuyinto esilethe ukufuthelana phakathi kweMDC lebandla leZanu PF.
Ukufuthelana lokhu sokubangele ukuthi uhulumende aphe umlandu ugatsha lweJOMIC wokuhlaziya ukuthi ngempela kuyini okwenzakalayo emapulazini.
UMongameli Robert Mugabe ukulandule ngolweSithathu ukuthi iziphathamandla zebandla lakhe ziphakathi kokuthumba amapulazi abalimi abamhlophe, esithi abalimi abasuswayo emapulazini okwamanje yilabo abaphikisa ukususwa kwabo nguhulumende.
Ingcwethi zithi okwenzakala emapulazini kuveza ukuthi akula mthetho okhona eZimbabwe. Bathi njalo akula lizwe elingafuna ukuphathisa eleZimbabwe nxa uhulumende eqhubeka ngokuthumba amapulazi.
Ukuhlaziya udaba lolu uNtungamili Nkomo uxhume ingcwethi kwezokulima uMnu Jonah Nkabinde loMnu Rejoyce Ngwenya. UNgwenya uthi ngokuqhubeka ethatha amapulazi lawa, uhulumende uzigeca enyaweni.
