Ikhomidi ebunjwa ngamabandla amathathu akusivumelwano sikahulumende womanyano eyokuletha ukuxolelana elizweni ibikwa ihlangane ngolweSithathu ihlaziya udaba lokubumba ikhomisheni yokuthonisa abalamacala ezombusazwe, iPeace and Reconcilliation Commission.
Abakukhomidi le babalisa uNkosikazi Sekai Holland owecele leMDC elikhokhelwa nguMnu. Morgan Tsvangirai, uMnu. Gibson Sibanda owelinye icele elikhokhelwa nguMnu. Arthur Mutambara loMnu. John Nkomo owe Zanu PF. Likhomidi ibunjwa nje kulembiko ethi kulokufuthelana okwesabekayo endaweni ezitsheiyeneyo zelizwe lapho okube lodlakela phambilini kokhetho lukamongameli nyakenye.
Kwafa abantu abafika phose amakhulu amabili kwalimala kabuhlungu abedlula inkulungwane ezingamatshumi amabili. Kwathethelwana njalo izifuyo lokunye ngaleso sikhathi.
Unobhala obona ngokuxolelana esigabeni sakoBulawayo kucele leMDC elikhokhelwa nguMnu. Morgan Tsvangirai uMnu. Norman Mabhena utshele uChris Gande weStudio 7 ukuthi bafisela ukuthi ikhomidi le ihle ilethe ukuxolelana ngodoba lwegukurahundi lapho okwafa inkulungwane zabantu besigaba semandebeleni lenkabazwe.
