Inhlanganiso yababulawa yizinso eye Zimbabwe Renal Association ithi icela uhulumende omutsha angenele ekulungisweni kwemitshina yokugeza igazi labagulayo esileminyaka emibili ifile ezibhedlela zikahulumende kanti njalo icela lokuthi kwehliswe imali ehlawulwa esibhedlela esisodwa sikahulumende esesiqalile ukupha loloncedo. Imitshina le iqale ukufa esibhedlela seMpilo koBulawayo ngo 2007 yaze yaphela yonke ngompandula womnyaka ophelileyo.
Kusukela lapho uhulumende usethembise kanengi ukuthi imitshina le izavuselelwa ngokuphangisa kanti uMongameli Robert Mugabe laye wathembisa ekhankasela usekelo kukhetho lukanhlangula ukuthi leyo mitshina izalunga kungakapheli inyanga. Konke lokho akwenzekalanga njalo kwatshiya abagulayo sebebhekane lezibhedlela ezizimele zodwa zona ezibiza imali engatholwa nguzulu. Lezinsuku zibiza i R3000 ukubona isigulane kanye ngeviki, okutsho ukuthi ogulayo usedinga i R12 000 ngenyanga.
Isibhedlela seParirenyatwa eHarare sibikwa sesilungisile imitshina yaso kodwa abagulayo bayithola ilokhu inengi kakhulu i R1 000 efuneka ukuze zelatshwe ngeviki.
