Uhulumende weMelika seqhelise izijesizo azethulele iziphathamandla zeZanu PF ngomunye njalo umnyaka. Ukujeziswa kweziphathamandla lezi bekumele kufike emaphethelweni ngolweSihlanu.
Kodwa embikweni awethule ngolweSithathu uMongameli Barack Obama wazise ukuthi seqhelise izijeziso lezi ngoba uhulumende weZimbabwe eqhubeka esephula ilungelo loluntu.
Lokhu kwenzakale ngalanga linye inhloko kahulumende wezZmbabwe uMnu Morgan Tsvangirai ecele amazwe afana leMelika leBhilithani ukuthi esule izijeziso lezi. Umanyano we European Union lawo suveze ukuthi okwamanje kawukazinikeli ukuthi uzesule lezi zijeziso.
Ekhuluma edaleni lephalamende ngolweSithathu uTsvangirai uxwayise uhulumende ukuthi ahloniphe ilungelo loluntu, yikho ukuthi ahuge amazwe athuthukileyo ukuthi amphathise njalo lokuthi abe lesithunzi.
Ingcwethi ecubungula ezombusazwe uMnu Mandlenkosi Gatsheni uthi okumqoka okufanele uTsvangirai akwenze okwamanje yikukhulumisana lenhlanganiso ezifana le World Bank leIMF hatshi ukukhankasela ukuthi izijeziso ezethulelwe iziphathamandla zeZanu PF zesulwe.
