UMnu Morgan Tsvangirai ufingisiwe ngolweSithathu ukuthatha isikhundla sokuba yinhloko kahulumende womanyano phakathi kweZanu PF le MDC kanye labasekeli bakhe ababili uMnu Arthur Mutambara loNkosazana Thokozani Khupe, emkhosini omkhulu oqhutshelwe eState House.
Ekhuluma emhlanganweni awenze ngemva kokufungiswa uMnu Tsvangirai uthembise ukuthi uhulumende omutsha uzasebenza gadalala alungisise zonke inhlupho uzulu abhekane lazo.
Uthembise njalo ukuthi uhulumende lo uzananza ilungelo loluntu, alungisise umnotho njalo aqakathekise ukubambana kukazulu kungelani lokuthi uvela kuliphi ibandla.
Ele South Africa lamukele ngenkulu injabulo ukufungiswa kuka Tsvangirai labasekeli bakhe, lakhuthaza njalo ukuthi uhulumende asebenze nzima alungisise inhlupho ezikhona.
Umanyano we European Union (EU) wona wazise ukuthi uzinikele ukuphathisa uhulumende omutsha ngoncedo lwemali lwenhlelo zentuthuko njalo avuselele umnotho.
Kodwa lumanyano uthi uhulumende lo kumele afake ilungelo likazulu phambili. Ingcwethi ecubungula ezombusazwe uMnu George Mkhwanazi uthi okwenzakaleleyo kunika uzulu ithemba ukuthi inhlupho ezikhona seziza nyamalala.
