Inhlanganiso ebona ngokulondolozwa kwamalungelo abantu emhlabeni jikelele eye Amnesty International ikhuthaza uhulumende omutsha ukuthi ahle aqale ngokulungisa udaba lwezamalungelo abantu. Inhlanganiso le yethule imicijo emihlanu ethi kumele ilandelwe nguhulumende omutsha ekulungisiseni umumo oselizweni.
Okwakuqala kuyikukhulula bonke ababotshelwe ezombusazwe abafana loNkosazana Jestina Mukoko. Okwesibili i Amnesty International ithi uhulumende omutsha kumele avumele inhlanganiso ezizimeleyo ukuthi zisebenze zikhululekile.
Okwesithathu ithi uhulumende lo kumele avume amacala okuhlukuluzwa kwabantu, uzulu akhulumisane ngakho, kuvikelwe ukuthi kuphinde kwenzakale njalo. Okwesine i Amnesty International ithi uhulumende lo kumele avikele ukwephulwa kwelungelo loluntu ngabasebenza kwezomvikela, njalo okwesihlanu yikulwisa ukudubeka okubhekane lozulu okugoqela indlala.
UBrenda Moyo WeStudio7 ukhulume lengcwethi ecubungula ezombusazwe uMnumzana Zenzo Nkomo othi okutshiwo yi Amnesty International kuza kuba nzima ukuthi iMDC ikufeze ngoba ibandla leZANU PF lalo lilokhe likhona embusweni.
