Inhlanganiso ebona ngelungelo labathengi, iConsumer Council of Zimbabwe ithi imali enelisa ukuphilisa imuli elabantu abayisithupha ngenyanga isiqonge yayafika kumadola eMelika edlula amakhulu amabili-US$240. Linhlanganiso ithi limali iqonge ivela kumadola emelika angamakhulu amabili, US$200.
Kodwa abantu abakhulume lestudio seven bathi limali ayenelisi ukuthenga okungaphilisa abantu abayisithupha ngenyanga eyodwa ngoba into zonke sezidula. Lokhu kugcizelelwe yingcwethi ecubungula ezombusazwe, uMnu. Effie Dlela Ncube otshele uChris Gande weStudio 7 ukuthi imuli eyodwa isifuna amadola emelika angamakhulu amahlanu ukuthenga okumqoka kuphela kungakhangelwa okunye okufana lemali yesibhedlela lokunye.
Kunjalo nje, imali entsha eyethulwe ngoMvulo ibikwa ibilokhu ingatholakali lula koBulawayo. Kodwa eHarare limali ibikwa ibigcwele emabhanga kodwa kungelabantu abayithathayo ngoba sekusetshenziswa eyakwamanye amazwe. Okunengi asikuzweni kuntathelizindaba yethu, uMasautso Banda
