Inhlanganiso yezisebenzi iZimbabwe Congress of Trade Unions (ZCTU), ixhaswe ngusowayo weSouth Africa, iCongress of South African Trade Unions (COSATU) isixwayise icele leMDC elikhokhelwa nguMnu Morgan Tsvangirai ukuthi lingalokothi lingene kuhulumende womanyano leZanu PF.
Bekhuluma lentathelizindaba Johannesburg ngolweSine, onobhala jikelele balezi nhlanganiso, uMnu Wellington Chibhebhe loMnu Zwelinzima Vavi baxwayise ukuthi abeMDC bengangena kuhulumende womanyano lo bazazisola ngoba uMugabe engasoze elungisise izikhalazo zabo njengokwethembisa kwakhe.
Ibandla likaTsvangirai lona lizahlangana ngolweSihlanu lihlaziye udaba lokuthi lingene kumbe lingangeni kuhulumende womanyano lo njengokukhuthaza kweSadc. UTsvangirai ngokwakhe ukhuthaze iNational Council yebandla lakhe efika eHarare ngolweSithathu ukuthi iphume lesinqumo esiqakathekisa impilo kazulu, yena obhekane lobunzima obukhulu.
Abanengi bathi imbiko kaTsvangirai le iveza sobala ukuthi ngempela usefuna ukungena kuhulumende womanyano kulungisiswe indubo uzulu abhekane lazo. UTsvangirai ukhuthaze njalo ukubambana kubandla lakhe lona elibikwa selidabukene phakathi phezu kokuvuma kwakhe emhlanganweni weSadc ukuthi uzangena kuhulumende womanyano leZanu PF.
Uzulu yena uthi ukhangelele ukuthi iNational Council kaTsvangirai inqume ukuthi icele leli lingene kuhulumende womanyano. Ukuhlaziya okulakho ukuphuma emhlanganweni wecele lika Tsvangirai sixhume ingcwethi ezicubungula ezombusazwe uMnu Brilliant Mhlanga loMnu George Mkhwanazi.
