Inkulumo zokuxazulula inkinga yozumbusazwe ziqale lamuhla eHarare ngemva kwenyanga ezimbili. UMongameli Mugabe, lenkokheli yamacele womabili eMDC, uMorgan Tsvangirai loMnu. Arthur Mutambara bahlangene loMongameli Kgalema Montlanthe wakwele South Africa ongumgcinisihlalo womanyano weSADC. Kanye lomlawuli, uMnu. Thabo Mbeki bencedisana loMongameli Amarndo Guebuza wakwele Mozambique, ongumsekeli kamgcinisihlalo wekhomidi yeSecurity and Defence eye SADC.
Lumhlangano uqala nje inhlangothi zombili zihle zazisa ukuthi kazisoze zitshedele emuva kulokhu ezikufunayo. UMugabe izolo utshele iphephandaba le The Sunday Mail ukuthi kasoze avume ukwengezela kulokhu osekuvunyelwene ngoba iSADC isigcizelele lesi sivumelwano. Kuthi ngakwelinye icele, idale leNational Executive Council lecele leMDC elikhokhelwa ngu Tsvangirai linqume ukuthi nxa uMugabe engavumanga ukuthi kwabiwe kutsha izikhundla zedale labaphathintambo, iCabinet, kukhethwe kakutsha osibalukhulu bezabelo labameli bakwamanye amazwe abasoze bangene kuhulumende womanyano.
Intathelizindaba yethu uMark Peter Nthambe use hoteleni ye Raibow Towers lapho okwenzelwa khona lezinkulumo.
Kunjalo nje, ingcwethi kwezombusazwe njalo ekhokhela ibandla lepuma, uMnu, Leornard Nkala utshele iStudio 7 ukuthi okunye okubangela ukuthi inkulumo lezi zingaphumeleli yikuthi akukhulunywa ukuthi vele owangqoba kukhetho ngubani.
