Usane oluleminyaka emibili olusesitokisini okwenyanga ezimbili lonina lubikwa lutshaywe ngamapholisa ukuze unina achaze ukuthi liqiniso na ukuthi bebefuna ukufundela ezebutho ukugenqula uhulumende. Lokhu kuvezwe ngamagqwetha alwela ilungelo loluntu eze aye entilongweni yeChikurubi lapho okuvalelwe khona lolusane uNigel Mutemaguwu lonina othunjwe labanye abasekeli bemdc kunyanga ezimbili ezedluleyo. Igqwetha elilwela ilungelo likazulu, uMnu Andrew Makoni utshele iStudio 7 ukuthi usane lolu luhlukuluzwe kakhulu okokuthi lalo ludinga ukwelatshwa ngodokotela. Kunjalo nje, abathunjwayo laba lomkhokheli wenhlanganiso ye Zimbabwe Peace Project, uNkosazana Jestina Mukoko belokhu bengakelatshwa njenga lokhu okunqunywe ngumthethwangaba izolo. Abathunjwayo laba ababalisa uMukoko babikwa bedinga ukwelatshwa ngoba betshaywe kabuhlungu ngamapholisa lensoli zikahulumende. Umthethwanda we high court unqume izolo ukuthi abathunjwayo laba kumele basiwe esibhedlela se Avenues Clinic. Sixoxe lengcwethi kwezombusazwe, uMnu. Max Mkandla othi ukuthunjwa kukamukoko kutshengisa ukuthi uhulumende uzimisele ukuthatha lawaphi amanyathelo ukuze angasuki embusweni.
