Amagqwetha amela uNkosazana Jestina Mukoko labasekeli beMDC abangamatshumi amane abikwa etshone ephakathi kokukhulumisana labodokotela ukuthi bethekelele abantu laba ezitokisini lapho abagcinwe khona bayebelapha.
Lokhu kulandela isinqumo esethulwe ngumthethwandaba kamantshi ngoMvulo esokuthi amapholisa kumele avumele odokotela ukuthi babone abantu laba, abanye babo abathi bahlukuluzwe ngamapholisa ngesikhathi bebuzisiswa ngamacala abetheswayo.
UNkosazana Mukoko labanye betheswa icala lokufuna ukugenqula uhulumende kaMongameli Mugabe. Elinye iqula labathunjiweyo laba eligoqela abasekeli beMDC abahlanu, lentathelizindaba uShadreck Manyere bona bamiswe emthethwandaba izolo besetheswa icala lokubhomba inkamba yamapholisa eHarare.
Phose bonke ekade bethunjiwe sebemisiwe emthethwandaba njalo bangamatshumi amane lanye okugoqela usane oluleminyaka emibili. NgolweSithathu khona umthethwandaba kamantshi uzakupha isinqumo sokuthi abantu laba bengakhululwa na bethoniswe bevela emizini yabo kumbe hatshi.
Amagqwetha abo athi afuna njalo umthethwandaba ubambe amapholisa ngamandla ukuthi aveze amabizo alabo ekade bebathumbile. Wona amapholisa ayakulandula ukuthi abantu laba bebesezandleni zawo ngesikhathi bengazakali ukuthi bangaphi.
