Namhlanje abeMDC abangamalunga edale lephalamende bafake isicelo kulelidale sokuthi kuhlaziywe udaba lokuthunjwa kwabasekeli balo labanye abantu. Lokhu kulandela ukuthunjwa kwamalunga amathathu alelibandla kuyonale iviki. Lelibandla libika ukuthi sokulabasekeli balo abedlula amatshumi amabili -23 asebethunjiwe kuze kube namhla.
Kumaviki amabili edluleyo kuthunjwe umqondisi wenhlanganiso yeZimbabwe Peace Project-ZPP uNkosazana Jestina Mukoko. Ngeviki edluleyo kwathunjwa izisebenzi ze ZPP ezimbili uMnumzana Broderick Takawira lomnumzana Pascal Gonzo. Ngeviki edluleyo njalo kuthunjwe uMnumzana Ghandi Mudzingwa osebenze okweminyaka ethize ehofisini kaMnumzana Morgan Tsvangirai loMnumzana Zacharia Nkomo umnewabo welinye igqwetha elilwela ilungelo loluntu uMnumzana Harrison Nkomo. Bonke abathunjiweyo akwaziwa ukuthi bangaphi.
UBrenda Moyo weStudio 7 ukhulume loNkosazana Thabitha Khumalo umsekeli wesikhulumi secele leMDC elikhokhelwa nguMnumzana Tsvangirai, othi ukuthunjwa kwabasekeli bebandla lakhe kuveza ukuthi iZANU PF iqhubeka isephula ilungelo loluntu elizweni.kunjalo nje ingcwethi ecubungula ezombusazwe uMnumzana Mqondobanzi Magonya utshele uBrenda Moyo ukuthi abathunjiweyo laba balakho ukungabonakali.
