Umanyano weSadc ususungule isikhwama sokuncedisa eleZimbabwe ukuthi liphume endlaleni elibhekane layo. Lumanyano ubumbe njalo iqula elizakwenza lumsebenzi.
Esethula isikhwama lesi ePretoria ngolweSithathu, uMongameli weSouth Africa, ongumgcinisihlalo njalo weSadc uMnu Kgalema Motlanthe uthe injongo yesikhwama lesi, esithiwa yiZimbabwe Humanitarian and Development Assistance Framework (ZHDAF) ngeyokudingela iZimbabwe lonke uncedo eludingayo - ngesiphangiphangi.
Isikhwama lesi sibunjwa nje kulandela umbiko wequla leSadc ebeliseZimbabwe kunsukwana ezedluleyo, owokuthi iudubo uzulu abhekane lalo solufike kuzinga elibi kakhulu.
UMotlante uthi iqula elizaqhuba umsebenzi wokudingela eleZimbabbwe uncedo phansi kwesikhwama lesi lizagoqela iziphathamandla zabohulumende bamazwe eSadc, inhlanganiso ezizimeleyo ezipha uncedo,
inkokheli zamabandla ezenkolo, inhlanganiso zabalimi lamaqula engatsha ezitshiyeneyo
eZimbabwe.
UMotlanthe ukhuthaze njalo ukuthi kubunjwe uhulumende womanyano eZimbabwe phakathi kweZanu PF leMDC iviki le ingakapheli aqale ukulwisana lobunzima obukhona elizweni. Kodwa iziphathamandla zecele leMDC elikhokhelwa nguMnu Morgan Tsvangirai kanye lezeZanu PF zitshele iStudio 7 ukuthi kaziboni lokhu kusenzakala ngoba kusakunengi amabandla la alokhu engakavumelani ngakho.
