Inhlanganiso ebona ngenhlelo zamanzi eyeZINWA isivale amanzi edolobheni leHarare leChitungwiza ngenxa yokusilela kwemithi yokuhlambulula amanzi, isithi izama ukuvimba ukumemetheka komkhuhlane wecholera. Lokhu sokutshiye izakhamizi zamadolobho la ebesivele ziphakathi kohlupho lokusilela kwamanzi zingazi ukuthi senzeni. Namhla amahofisi amanengi aphakathi kwedolobho leHarare acine evalwa izisebenzi zabuyiselwa emakhaya.
UBrenda Moyo weStudio 7 ukhulume losaphethe isikhundla sokwethulwa kwemibiko kunhlangansio yeCombined Harare Residents Association i CHRA, uMnumzana Meli Dube othi iZINWA isiyehlulekile ukuqhuba inhlelo zamanzi elizweni, esithi kumele umsebenzi lo ubuyiselwe kubomanisipala bamadolobho.
kunjalo nje inhlanganiso ye Zimbabwe Doctors for Human Rights itshele istudio 7 ukuthi inani labantu asebebulewe ngumkhuhlane wecholera elethulwa nguhulumende aliqinisekanga. Udokotela Douglas Gwatidzo umqondisi walinhlanganiso uthi uhulumende uthi abantu asebebulewe yilo umkhuhlane bedlula amakhulu amane kuphela kodwa ukucubungula kwenhlanganiso le kuveze ukuthi asebefile bedlula inkulungwane kuthi abahlaselwe yicholera bedlula inkulungwane ezilitshumi lanye. Udokotela Gwatidzo uthi umkhuhlane lo uhlasele imizi embalwa eHarare leBeitbridge.
Namhla iziphathamandla zecele leMDC elikhokhelwa nguMnumzana Morgan Tsvangirai zibhode edolobheni leHarare emizini ehlaselwe yicholera zihlolisisa umumo. iziphathamandla lezi ezigoqela unobhala kwezempilakahle umnumzana Henry Madzorere zithi umumo awumuhle emzini efana leBudiriro, zisithi zizazama ukudingela labo abagulayo uncedo.
Ngeviki edluleyo kuphume imibiko yokuthi kulezibotshwa eziyisikhombisa ezibulewe yichorela emajele eHarare leChinhoyi.
UBrenda Moyo weStudio 7 uphinde wakhuluma lentathelizindaba yako Bulawayo engathandanga ukuqanjwa ngegama ethi emajele eZimbabwe avele esaziwa ngengcekeka akusoze kusweleke icholera.
Ezinye Indaba ZeStudio7...
.
