Inhlanganiso yezisebenzi eyeZimbabwe Congress of Trade Unions ikhuthaza uzulu ukuthi atshengisele emabhanga ngeviki ezayo, ekhonona ngokuvunyelwa ukuthatha i$500,000 kuphela ngelanga. IZCTU ithi abantu kumele bazame ukuthatha imali edlula leyo emabhanga ngolwesithathu ngeviki ezayo njengendlela yokutshengisa ukukhonona kwabo.
IZCTU ithi i$500,000 kayeneli lutho njalo ababulawa yimikhuhlane eyehlukeneyo, ikakhulu abahlaselwe ngumkhuhlane wecholera osubhahile ngalezinsuku sebethwele nzima besehluleka ukuthenga imithi abayifunayo ngenxa yokusilela kwemali.
Kwamanye amadolobho njengako Bulawayo imitshova isibizela i $700,000 kuhambo lunye. Uzulu usele ethithibele njalo ngodaba lokuthi usibalukhulu webhanga elikhulu lelizwe iReserve Bank Of Zimbabwe, uMnumzana Gedion Gono usebuyiselwe njalo esikhundleni sokubangusibalukhulu nguMongameli Robert Mugabe okweminyaka emihlanu elandelayo.
UBrenda Moyo WeStudio 7 ukhulume lengcwethi kwezenotho uMnumzana Rejoice Ngwenya othi uhulumende kaMugabe usebhidlize into yonke elizweni wafaka abantu beZimbabwe phakathi kohlupho oluphindiweyo.
