Umongameli George Bush weMelika usethembise ukupha izikhali zombuso kuMnumzana Barack Obama osekhethwe ukuba ngumongameli weMelika. UMongameli Bush uthi uzakupha uObama amacebo ukuze angene kuhle embusweni welizwe leMelika, okuyinto engakaze yenzakale ukuthi umongameli osetshiya isikhundla asebenzelane losengena esikhundleni. Laloba bekhona abasola lelinyathelo inengi lithi umongameli Bush wenza into ebukekayo.
Kunjalo nje uObama lemuli yakhe sebenxuswe esigodlweni sikamongameli Bush eWhite House.UNkosikazi Laura Bush namhlanje utshayele ucingo uNkosikazi Mitchelle Obama emxusa eWhite House.
Laloba kulokujabula okukhulu emhlabeni jikelele ngokukhethwa
konsundu wakuqala ukukhokhela ilizwe leMelika, ingcwethi ezicubungula
ezombusazwe kweleMelika zithi uMnumzana Obama ukhangelane lomthwalo onzima
ikakhulu kudaba lokulungisisa umnotho weMelika osubhidlikile.
UBrenda Moyo weStudio 7 ukhulume lengcwethi ezicubungula ezombusazwe ezimbili oMnumzana Bekithemba Mhlanga lo Arthur Molife ukuhlaziya udaba lokukhethwa kuka Obama ukuba ngumongameli weAmerica.
Ingcwethi zethu zikhangela ukuthi ukungena esikhundleni kuka Obama kutshoni elizweni leMelika lasemhlabeni jikelele. UMolife uthi ukukhethwa kuka Obama kwesula udaba lwenkethabetshabi, lokukhethana ngemibala. Umhlanga esithi uObama uletha ithemba emhlabeni jikelele
