Inhlanganiso ekhankasela ukulondolozwa kwelungelo loluntu emhlabeni jikelele, iAmnesty International (AI) ithi ukuhlukuluzwa kukazulu lokwephulwa kwelungelo loluntu kuqhubekela phambili eZimbabwe uhulumende engagqize qhakala.
Linhlanganiso ithi amapholisa yiwo akhokhela umkhankaso wokuhlumeza uzulu lo, encedisana leziphathamandla zeZanu PF. Embikweni ewethule lamuhla iAmnesty International ikhuthaze ukuthi bonke abephula ilungelo loluntu eZimbabwe kumele bathoniswe.
Amalunga eMDC edaleni lephalamende wona acele lelidale kumaviki amabili edluleyo ukuthi lisungule ikomidi ezacubungula udaba lokutshaywa kanye lokubulawa kwabantu ngesikhathi sokhetho lukaMbimbitho. Idale leli lizahlaziya loludaba ngenyanga ezayo seliqalile njalo ukuhlala.
IAmnesty International ithi iphatheke kubi ngokudonselana phakathi kweMDC leZanu PF phezu kodaba lwezikhundla zecabinet, isithi ukudonselana lokhu kukhuthaza ukwephulwa kwelungelo likazulu, ikakhulu yizikliwi zeZanu PF.
Kodwa ibandla leZanu PF likulandule lokhu. Igqwetha elilwela ilungelo loluntu kunhlanganiso yeZimbabwe Lawyers for Human Rights, uMnu Tineyi Mukwewa ugcizelele umbiko weAmnesty International lo, wapha izibonelo zezinye zezehlakalo zokwephulwa kwelungelo okwenzakala mihla lamalanga eZimbabwe.
