Icele leMDC elikhokhelwa nguMnu Morgan Tsvangirai lithi iSadc Troika ingehluleka ukuxazulula inkinga yezikhundla zedale labaphathintambo, icabinet ngoMvulo kuyabe sokumele lubizelwe umhlangano omkhulu wamalunga wonke aweSadc.
Amacele womabili eMDC athi akhangelele ukuthi umhlangano wangoMvulo lo, wona ozaqhutshelwa eHarare wenelise ukulamula umbango wezikhundla zecabinet.
Laloba ibandla leZanu PF selivumile ukuthi ugatsha lwezemali luye kuMDC ekhokhelwa nguMnu Morgan Tsvangirai, amabandla la alokhu edonselana phezu kwengatsha ezifana lelocal government, foreign affairs, lands and agriculture, information, women, youth, justice kanye le home affairs.
Umhlangano wangoMvulo ulandela umhlangano obumele uqhutshelwe eSwaziland ekuqaleni kweviki, wona ongasabanga khona ngoba uTsvangirai engahambanga kwelikaMswati. Umsekeli kaTsvangirai, uNkosazana Thokozani Khupe uthi bakhangelele ukuthi umhlangano weTroika lo ulungisise udaba lwezikhundla.
Ngakwelinye icele umsekeli wesikhulumi secele leMDC elikhokhelwa nguMnu Arthur Mutambara uMnu Renson Gasela uthi laloba ibandla lakhe lisola ukudonselana okukhona, lisekela icele likaTsvangirai kudaba lokuthi lithole ingatsha ezimqoka ezifana logatsha lwe home affairs.
