Udaba lokusilela kokudla elizweni solufike kuzinga elibi, okwenze lwajikelwa enkundleni yedale lephalamende ngamalunga eMDC kulandela imbiko yokuthi kulabantu asebebulewe yindlala.
Amalunga alelidale afuna uhulumende anqume ukuthi indlala siyingozi enkulu elizweni, okuthiwa yiNational Disaster ngesingisi, esithi uhulumende kumele athathe amanyathelo.
Laloba amalunga eMDC esole uhulumende
weZanu PF ngokwehluleka ukuvikela indlala yona esibhahe emaphandleni lemadolobheni ngokufanayo, amalunga eZanu PF wona athe isisusa sendlala
yikwethulelwa izijeziso zenotho okwenziwa amalunga ebandla lawo lamankampani
asebenzelana lohulumende kaMongameli Mugabe ngamazwe afana leMelika leBhilithane.
Athi afuna njalo ukuthi uhulumende evumele uzulu ukuthenga ukudla
phandle ekungenise elizweni kungela mali yomthelo, i duty ebhadalwayo, kutsho umeli weNkayi South edaleni lephalamende uMnu Abednico Bhebhe ekhuluma loNtungamili Nkomo weStudio 7.
