Sekufe abantu abambalwa endaweni ezitshiyeneyo zelizwe ngenxa yendlala. Lokhu kwenzakala uhulumende wakwele South Africa esithi uzakupha iZimbabwe imali engamarand afika izigidi ezingamakhulu amathathu, 300 million ukuthenga ukudla. Kodwa umphathintambo wezemali uMnu. Trevor Manuel utshele idale lephalamende lalelo lizwe ukuthi limali izanikezwa uhulumende womanyano ozavumela inhlanganiso zakwamanye amazwe ukuthi ziphathise. Inhlanganiso yomanyano wamazwe, iUnited Nations ithi uncedo lokudla elupha iZimbabwe lulakho ukusilela ngenyanga kazibandlela ngoba inani labalufunayo loluncedo seliqonge layafika kuzigidi ezinhlanu, ifive million. Kunjalo nje,
inhlanganiso ye Christian Alliance, encedisa inkulungwane lenkulungwane zemuli ezilondoloza intandane ko Bulawayo lakwezinye izigaba zemaphandleni eMatabeleland ngokudla ithi isimise umsebenzi wayo okwesikhatshana ngoba ingasatholi ukudla okweneleyo kokupha abantu.Inhlanganiso le iholisa umuntu oyedwa ngenyanga umumbu wesilinganiso se 10 kg, amafutha okuphekisa, indumba kanye lelambazi njalo ithi ilethemba lokuthi izaqhubeka ngomsebenzi wayo kunyanga ezayo.
Lokhu kwenzakala izakhamizi zemadolobheni agoqela ele Bulawayo zisithi ukudla ezakuthenjiswa nguhulumende phansi kohlelo lwe BACOSSI lokhu zingakakuboni.
Ezinye inhlanganiso ezipha abantu ukudla ezigoqela i World Vision zibikwa seziqalisile umsebenzi wazo kodwa zingakafinyeleli kwezinye izigaba zelizwe ngenxa yokuthi uncedo lwazo lulutshwana.
UMfundisi Promise Manceda, isiphathamandla se Christian Alliance, utshele istudio 7 ukuthi inhlanganiso yakhe isanda kuthola imbiko yokuthi kubhubhe abantu abathathu ezigabeni ezitshiyeneyo ze Matabeleland ngenxa yokuswela ukudla.
UMnu. Abednico Bhebhe, omela iNkayi e dale lephalamende, ekucele le MDC elikhokhelwa nguMnu. Arthur Mutambara utshele istudio 7 ukuthi indlala ekulesisigaba iyesabeka njalo kusanda kubhubha abantwana abahlanu bedle amahabahaba ngenxa yokuswelakala kokudla.
