Laloba abalimi bekhangelelwe ukuba sebeqalisile ukuphendula umhlabathi belungiselela ukulima, kubikwa kungela malungiselelo alohlonzi enzakalayo elizweni jikelele ngoba kulokusilela kwenhlanyelo lemvundiso. Ngalokhu, abalimi sebesesabela ukuthi isivuno somnyaka ozayo sizasilela, okuzabangela ukuthi indlala iqhubeke isidla ubhedu.
Bathi njalo ukuphuza kwezulu kungaba kuveza sobala ukuthi lezulu lalo lizasilela lonyaka. Ngenxa yesivuno sanyakenye esibe sincane, inhlanganiso eziphathisa uzulu ngokudla zithi izigidi ezintathu zabantu zidinga ukuphathiswa ngokudla okwamanje, besithi umnyaka usiyaphela inani leli lizaqansa liye kuzigidi ezinhlanu.
Ukuze
sihlaziye udaba lokusilela kwento zokulimisa lolu, sixhume ingcwethi
kwezokulima njalo elilunga ledale lephalamende elimela imangwe edaleni
lephalamende uMnu Edward Mkhosi samxhumanisa ndawonye lengcwethi kwezenotho
umnu Rejoyce Ngwenya. UMkhosi uthi uhulumende kazihluphi ngokudingela uzulu
inhlanyelo lemvundiso laloba nje esithi ulenhlelo zokwenza lokhu.
Njengenjayelo, uSithandekile Mhlanga uxoxe labalaleli bethu abasithumele ama text messages ukuze sizwe imbono yabo ngodaba lokulima lolu. Othe simubize ngokuthi nguMnu. Michael we Njube ko Bulawayo uthi akulula ukuthola inhlanyelo yokuthumezela abazali bakhe eLupane ngoba ingatholakali ezitolo njalo lapho etholakala khona ithengiswa ngemali yakwamanye amazwe engeneliswa ngabanengi.
Omunye njalo umlaleli we studio 7 uMnu. Gordon Dube, isizalwane se Zimbabwe esihlala e South Africa utshele uSithandekile Mhlanga we studio 7 ukuthi bekukuhle ukuthi abantu bezithengele izinto zokulimisa ezitolo ngoba loba ethumele inhlanyelo ekhaya, kasoze enelise ukuthumela konke okudingakalayo ekulimiseni.
