Umkhokheli welinye lamacele eMDC uMnu Morgan Tsvangirai ngolweSine wazise ukuthi ibandla lakhe selimise ukukhulumisana leZanu PF ngoba uMongameli Mugabe lebandla lakhe bengafuni ukuthi izikhundla ezimqoka kucabinet zabelwane.
Ekhuluma lentatheli eHarare uTsvangirai uveze njalo ukuthi sebebize Mnumzana Thabo Mbeki ukuthi aze eZimbabwe angenele kuloludaba. UTsvangirai uthe uMbeki ubethembisile ukuthi usendleleni uyeza, laloba engacacanga ukuthi uzafika nini elizweni.
UMbeki unikezwe umlandu wokuba ngumlamulankunzi kudaba lweZimbabwe ngumanyano weSADC. Iziphathamandla zeZanu PF zalile ukukhuluma phezu kwenyathelo eselithethwe yiMDC leli.
Ingcwethi ecubungula ezombusazwe uMnumzana Bhekinkosi Moyo utshele uNtungamili Nkomo weStudio 7 ukuthi kuzakuba nzima ukuthi u Mbeki axazulule umbango wezikhundla lo ngoba iZanu PF sikubeke sobala ukuthi kayimfuni ukuthi angenele ngalesisikhathi.
